સુરત જિલ્લામાં આદિજાતિ વિકાસ માટે 87.18 કરોડના વિકાસ કામોને મંજૂરી

સુરત જિલ્લા કલેક્ટર કચેરી ખાતે જિલ્લા આદિજાતિ વિકાસ મંડળ-2026-27ની મહત્વપૂર્ણ બેઠક યોજાઈ હતી. રાજ્યના નાણા અને શહેરી વિકાસ મંત્રી શ્રી કનુ દેસાઈએ આ બેઠકની અધ્યક્ષતા કરી હતી. આ બેઠકમાં કુલ 87.18 કરોડ રૂપિયાના ખર્ચે 1944 વિકાસ કામોને મંજૂરી આપવામાં આવી હતી. આ મંજૂર થયેલા કામો 96 ટકા અને 4 ટકા વિવેકાધિન જોગવાઈ હેઠળ આવરી લેવાયા છે.

મંત્રી શ્રી કનુ દેસાઈએ જણાવ્યું હતું કે, પ્રજાના હિતના કાર્યો ગુણવત્તાયુક્ત અને નિર્ધારિત સમયમર્યાદામાં પૂર્ણ થવા અત્યંત આવશ્યક છે. તેમણે સંબંધિત અધિકારીઓને પરસ્પર સંકલન જાળવીને અસરકારક રીતે કામગીરી કરવા પર ભાર મૂક્યો હતો. આ મંજૂર થયેલા કામોમાં કૃષિ, પશુપાલન, ડેરી વિકાસ, વનવિકાસ, ગ્રામ્ય વિકાસ, સિંચાઈ, પોષણ, માર્ગ અને પુલોના નિર્માણ જેવા વિવિધ ક્ષેત્રોનો સમાવેશ થાય છે, જે 96 ટકા જોગવાઈ હેઠળ આવરી લેવાયા છે.

આ બેઠકમાં જિલ્લા પંચાયત પ્રમુખ શ્રી સમીર મોદી, ધારાસભ્યો શ્રી ગણપત વસાવા, શ્રી મોહન ઢોડિયા, શ્રી ઈશ્વર પરમાર, જિલ્લા કલેક્ટર શ્રી તેજસ પરમાર સહિત અન્ય ઉચ્ચ અધિકારીઓ ઉપસ્થિત રહ્યા હતા. બેઠક દરમિયાન, ગત વર્ષ દરમિયાન થયેલા વિકાસ કામોની સમીક્ષા પણ કરવામાં આવી હતી અને તેના અમલીકરણ અંગે ચર્ચા કરવામાં આવી હતી.