સુરતમાં શ્યામ સંગિની ટેક્સટાઇલ માર્કેટમાં ભયંકર આગ, 8 કલાકમાં કાબૂ મેળવ્યો

સુરતના સારોલી વિસ્તારમાં આવેલ શ્યામ સંગિની ટેક્સટાઇલ માર્કેટમાં મોડી રાત્રે, 12:50 વાગ્યે આગ લગતી હોવાનું ફાયર કંટ્રોલ રૂમને કોલ મળ્યો. શરૂઆતમાં છ ફાયર ફાઇટર વાહનો સ્થળે પહોંચ્યા, પરંતુ આગની ગંભીરતા વધતા બ્રિગેડ કોલ જાહેર કરવામાં આવ્યો.

બ્રિગેડ કોલ પછી 15 થી 20 ફાયર બ્રિગેડના વાહનો તૈનાત કરવામાં આવ્યા. ટર્નટેબલ લેડર, હાઇડ્રોલિક પ્લેટફોર્મ, વોટર બાઉઝર, ફાયર એન્જિન અને ટેન્કરની મદદથી આગ પર કાબૂ મેળવવાની કામગીરી શરૂ થઈ.

ભારે ધુમાડા, અંધકાર અને પેસેજમાં પડેલા માલસામાનને કારણે ફાયરજવાઓને કામગીરીમાં કઠિનાઈનો સામનો કરવો પડ્યો. પ્રાથમિક જાણકારી મુજબ ચારથી પાંચ દુકાનો આગની ઝપેટમાં આવી હતી.

લગભગ આઠ કલાકની જહેમત બાદ આગનો કેટલાક અંશે કાબૂ મેળવાયો, પરંતુ ફાયર અધિકારીઓએ જીવના જોખમે કામ કર્યું. માર્કેટમાં આગ નિવારક ઉપકરણો બંધ હોવા અને માલસામાનનું ઓવરલોડ હોવાના પ્રશ્નો ઉઠ્યા છે.