ભેસાણ નજીક મુસાફરો ભરેલું મેજિક વાહન પલટ્યું, 8 લોકો ઈજાગ્રસ્ત

જૂનાગઢ જિલ્લાના ભેસાણ તાલુકાના ભટગામ નજીક મુસાફરો ભરેલું એક મેજિક વાહન અચાનક પલટી મારી ગયું હતું. આ ગમખ્વાર અકસ્માતમાં વાહનમાં સવાર આઠ જેટલા મુસાફરોને ઈજાઓ પહોંચી હતી.

પ્રાથમિક માહિતી અનુસાર, આ મેજિક વાહન ભટગામ પાસેથી પસાર થઈ રહ્યું હતું ત્યારે કોઈ કારણોસર ચાલકે વાહન પરથી કાબૂ ગુમાવ્યો હતો. જેના કારણે વાહન રોડની બાજુમાં પલટી મારી ગયું હતું. અકસ્માત સર્જાતા આસપાસના લોકો તાત્કાલિક મદદ માટે દોડી આવ્યા હતા.

સ્થાનિક લોકોની મદદથી ઈજાગ્રસ્તોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા હતા. પોલીસ ઘટનાસ્થળે પહોંચી વધુ તપાસ હાથ ધરી છે. અકસ્માતના ચોક્કસ કારણોની તપાસ હાલ ચાલી રહી છે.