સુરતના ઉધનામાં બેફામ કાર ચાલકનો કહેર: 7થી 8 વાહનોને અડફેટે લીધા, એક કારચાલક ઘાયલ

સુરત શહેરના ઉધના વિસ્તારમાં રફ્તારનો કહેર યથાવત જોવા મળ્યો છે. અહીં એક બેફામ ગતિએ દોડતી કારના ચાલકે માર્ગ પર ભારે અકસ્માત સર્જ્યો હતો. આ અકસ્માતને પગલે ઘટનાસ્થળે લોકોના ટોળા એકઠા થઈ ગયા હતા.

આ ઘટનામાં બેફામ કાર ચાલકે માર્ગ પરથી પસાર થઈ રહેલા 7થી 8 વાહનોને અડફેટે લીધા હતા. આ ગંભીર અકસ્માતમાં એક કારચાલકને ઈજાઓ પહોંચી હતી, જેને તાત્કાલિક સારવાર અર્થે હોસ્પિટલ ખસેડવામાં આવ્યો છે.

અકસ્માત સર્જાયા બાદ સ્થાનિક લોકો તાત્કાલિક ઘટનાસ્થળે દોડી આવ્યા હતા અને ઈજાગ્રસ્તને મદદ કરી હતી. આ સાથે જ ઘટનાની જાણ થતાં પોલીસ પણ સ્થળ પર પહોંચી ગઈ હતી અને અકસ્માત અંગે તપાસ શરૂ કરી છે.