બોટાદ નજીક સમઢિયાળા પાસે જાહેરમાં જુગાર રમતા 7 ઝડપાયા, રૂ. 42,600નો મુદ્દામાલ કબજે

બોટાદ જિલ્લાના સમઢિયાળા ગામ નજીક જાહેરમાં ગંજીપાના વડે હારજીતનો જુગાર રમી રહેલા સાત શખ્સોને બોટાદ LCB પોલીસે ઝડપી પાડ્યા છે. આ કાર્યવાહી ધોળાના તળાવ પાસે કેનાલના કાંઠે કરવામાં આવી હતી. પોલીસે ઘટના સ્થળેથી રોકડ રકમ રૂ. 42,600 અને ગંજીપાના કબજે કરી કાયદેસરની કાર્યવાહી હાથ ધરી છે.

મળતી માહિતી મુજબ, પોલીસને તા. 22 સપ્ટેમ્બર 2026ના રોજ બાતમી મળી હતી કે સમઢિયાળા ગામથી સુંથળી ગામ તરફ જતાં ધોળાના તળાવ પાસે કેનાલના કાંઠે કેટલાક શખ્સો જાહેરમાં જુગાર રમી રહ્યા છે. આ બાતમીના આધારે LCB પોલીસે તાત્કાલિક રેડ પાડી હતી.

પોલીસે રેડ દરમિયાન યુવરાજભાઈ કનુભાઈ ખાચર, બાબાભાઈ અનકભાઈ ખાચર, મનુભાઈ બાબાભાઈ ખાચર, પ્રવીણભાઈ દયાળભાઈ માખણા, શૈલેષભાઈ દિલીપભાઈ વીરજા, અજીતભાઈ ભુપતભાઈ પટગીર અને કિશોરભાઈ અવસરભાઈ પરંડીયાને ઝડપી પાડ્યા હતા. આ ઝડપાયેલા આરોપીઓમાંથી કેટલાક સમઢિયાળા નં.1, કારિયાણી, ગાયત્રીનગર અળવ રોડ બોટાદના રહેવાસી છે, જ્યારે કેટલાક મૂળ લાઠીદડના અને હાલ બોટાદમાં રહેતા હોવાનું જાણવા મળ્યું છે.

પોલીસે આ સાતેય આરોપીઓ પાસેથી કુલ રૂ. 42,600ની રોકડ રકમ અને 52 નંગ ગંજીપાના મળી કુલ રૂ. 42,600નો મુદ્દામાલ કબજે કર્યો છે. પોલીસે તમામ આરોપીઓ વિરુદ્ધ જુગારધારા હેઠળ ગુનો નોંધી વધુ તપાસ હાથ ધરી છે.