ભાવનગરમાં ડુપ્લીકેટ દારૂનો કહેર! 6 લોકોની તબિયત લથડી, 29 વર્ષીય યુવકનું શંકાસ્પદ મોત

ભાવનગર જિલ્લામાં દારૂના સેવન બાદ 6 વ્યક્તિઓની તબિયત લથડતા હાલ તેઓ સારવાર હેઠળ છે. આ સમગ્ર મામલે પોલીસ દ્વારા તપાસનો ધમધમાટ શરૂ કરવામાં આવ્યો છે.
પ્રાથમિક તપાસમાં સામે આવ્યું છે કે ગૌતમ સોલંકી નામના બુટલેગર દ્વારા રોયલ સ્ટેગ નામની બોટલમાં ડુપ્લીકેટ દારૂ ભરી તેનું વેચાણ કરવામાં આવ્યું હોવાની માહિતી મળી છે.
ખરકડી ગામના 4થી વધુ યુવાનોની તબિયત આ દારૂના સેવન બાદ બગડી હોવાનું સામે આવ્યું છે. જેમાં એક 29 વર્ષીય યુવાનનું શંકાસ્પદ મોત પણ થયું છે.
સમગ્ર મામલે પોલીસે 4 બુટલેગરો સામે તપાસ શરૂ કરી છે તેમજ ડુપ્લીકેટ દારૂ જ્યાં જ્યાં સપ્લાય થયો હોવાની શક્યતા છે ત્યાં પણ તપાસ હાથ ધરવામાં આવી છે.
જિલ્લા પોલીસ વડાએ લોકોને અપીલ કરી છે કે છેલ્લા ત્રણ દિવસમાં દારૂનું સેવન કર્યું હોય અને તબિયતમાં કોઈપણ પ્રકારની તકલીફ જણાય તો તાત્કાલિક હોસ્પિટલમાં જઈને ચેકઅપ કરાવવું.