અમદાવાદ: ટ્રાફિક બાબતે થયેલી બબાલમાં સગીર અને કાકા પર 5 શખ્સો દ્વારા દુકાનમાં ઘૂસી મારામારી

અમદાવાદ શહેરના કારંજ વિસ્તારમાં ટ્રાફિકમાં વાહન હટાવવા જેવી સામાન્ય બાબતે થયેલી બબાલ બાદ 5 શખ્સોએ એક 17 વર્ષીય સગીર અને તેના કાકા પર હુમલો કર્યો હતો. આ ઘટના ઢાલગરવાડ વિસ્તારમાં બની હતી, જ્યાં આરોપીઓએ દુકાનમાં ઘૂસીને બંને પર મારામારી કરી હતી.

પ્રાપ્ત માહિતી અનુસાર, ટ્રાફિકમાં વાહન હટાવવાની બાબતે થયેલા ઝઘડાએ ઉગ્ર સ્વરૂપ ધારણ કર્યું હતું. ત્યારબાદ પાંચ જેટલા શખ્સોએ મળીને સગીર અને તેના કાકા પર હુમલો કર્યો હતો. આ ઘટના બાદ વિસ્તારમાં ચકચાર મચી જવા પામી હતી.

આ મામલે કારંજ પોલીસે ફરિયાદ નોંધી છે. ફરિયાદમાં ઇરફાન ઘાંચી, રિયાઝ શેખ, નૂર મહંમદ શેખ, ઇરફાન શેખ અને ઇકબાલ શેખ સહિત પાંચ શખ્સોના નામ સામેલ છે. પોલીસે ફરિયાદના આધારે આગળની તપાસ હાથ ધરી છે અને આરોપીઓને ઝડપી પાડવાના પ્રયાસો શરૂ કર્યા છે.