અમદાવાદમાં રાજસ્થાનથી આવતા નકલી પનીરનું કૌભાંડ ઝડપાયું: 408 કિલો જથ્થો જપ્ત

અમદાવાદમાં રાજસ્થાનથી આવતા એનાલોગ પનીરના વેચાણનું મોટું કૌભાંડ સામે આવ્યું છે. પોલીસે બે લક્ઝરી બસમાંથી કુલ 408 કિલો શંકાસ્પદ પનીરનો જથ્થો જપ્ત કર્યો છે. આ પનીરનું ઉત્પાદન રાજસ્થાનના જોધપુર અને પાલી ખાતે આવેલા મેન્યુફેક્ચરિંગ યુનિટમાં કરવામાં આવતું હોવાનું તપાસમાં બહાર આવ્યું છે.

પ્રાપ્ત માહિતી અનુસાર, આ પનીરના પેકેટ પર 450 રૂપિયાની MRP છાપવામાં આવી હતી, પરંતુ તેને ગ્રાહકોને માત્ર 240 રૂપિયાના ભાવે વેચવામાં આવતું હતું. આ જથ્થો લેવા માટે બે વ્યક્તિઓ પહોંચ્યા હતા, જેમને પોલીસે અટકાયતમાં લીધા છે.

બજારમાં સસ્તા ભાવે વેચાતા આ પનીરની ગુણવત્તાને લઈને ગંભીર સવાલો ઉભા થયા છે. હાલમાં પોલીસ અને સંબંધિત વિભાગ દ્વારા આ મામલે વધુ તપાસ હાથ ધરવામાં આવી છે જેથી આ નેટવર્કમાં સામેલ અન્ય લોકોની ઓળખ કરી શકાય.