મુંબઈ-અમદાવાદ એક્સપ્રેસ વે પર ભયાનક અકસ્માત: કાર ડમ્પર પાછળ ઘૂસી જતાં 4 લોકોના મોત

મુંબઈ-અમદાવાદ એક્સપ્રેસ વે પર સુરતના કામરેજ તાલુકાના દિગસ ગામની હદમાં તાપી બ્રિજ નજીક એક ગમખ્વાર અકસ્માત સર્જાયો છે. એક ડમ્પરમાં ટેક્નિકલ ખામી સર્જાતાં અને એર આવી જતાં ડ્રાઇવરે વાહનને રસ્તાની સાઇડમાં ઊભું રાખ્યું હતું.

આ દરમિયાન, મુંબઈથી પાટણ જઈ રહેલી એક હેરિયર કાર પૂરપાટ ઝડપે આવી રહી હતી અને તેણે ઊભેલા ડમ્પર પાછળ જોરદાર ટક્કર મારી હતી. આ અકસ્માત એટલો ભયાનક હતો કે કારનો કચ્ચરઘાણ વળી ગયો હતો.

દુર્ભાગ્યે, કારમાં સવાર તમામ ચાર લોકોના ઘટનાસ્થળે જ કરુણ મોત નીપજ્યા હતા. અકસ્માતની જાણ થતાં જ જિલ્લા ટ્રાફિક પોલીસ તાત્કાલિક ઘટનાસ્થળે પહોંચી હતી. પોલીસે મૃતદેહોને સરકારી હોસ્પિટલમાં ખસેડવાની કાર્યવાહી હાથ ધરી હતી અને વાહનવ્યવહારને પુનઃસ્થાપિત કર્યો હતો.