ગીર સોમનાથ: સુલતાનપુર ગામમાં ભારે વરસાદમાં ઘરમાં ફસાયેલા 4 લોકોનું સફળ રેસ્ક્યૂ

ગીર સોમનાથ જિલ્લાના ઉના તાલુકામાં આવેલા સુલતાનપુર ગામમાં ભારે વરસાદના કારણે પરિસ્થિતિ વણસી છે. ગામના નીચાણવાળા વિસ્તારોમાં પાણી ભરાઈ જતાં અનેક ઘરોમાં પાણી ઘૂસી ગયા હતા. આ ઘટનામાં 4 નાગરિકો પોતાના ઘરોમાં ફસાઈ ગયા હતા.

વહીવટીતંત્ર અને SDRF (સ્ટેટ ડિઝાસ્ટર રિસ્પોન્સ ફોર્સ)ની ટીમે તાત્કાલિક ધોરણે બચાવ કાર્ય શરૂ કર્યું હતું. મધ્યરાત્રિ દરમિયાન, સંયુક્ત ટીમોએ સફળતાપૂર્વક ફસાયેલા ચારેય નાગરિકોને સુરક્ષિત રીતે બહાર કાઢ્યા હતા.

બચાવ બાદ, તમામ લોકોને સુલતાનપુર પ્રાથમિક શાળા ખાતે સુરક્ષિત રીતે ખસેડવામાં આવ્યા છે. ત્યાં તેમના રહેવા, જમવા અને અન્ય જરૂરી વ્યવસ્થાઓ સુનિશ્ચિત કરવામાં આવી રહી છે, જેથી તેઓ સલામત રહી શકે.