અમદાવાદ: હજારો સ્ટ્રીટ લાઇટો ઝાંખી, 350-400 રોજની ફરિયાદોથી નાગરિકો પરેશાન

અમદાવાદ શહેરમાં સ્ટ્રીટ લાઇટોની સમસ્યા વકરી રહી છે. શહેરમાં અંદાજે બે લાખથી વધુ સ્ટ્રીટ લાઇટ પોલ આવેલા છે, જેમાંથી 80 હજાર કરતાં વધુ સ્ટ્રીટ લાઇટોનો પ્રકાશ ઝાંખો પડી ગયો છે. આ ઝાંખા પ્રકાશને કારણે રાત્રિ દરમિયાન રાહદારીઓ, વાહનચાલકો અને સ્થાનિક રહેવાસીઓ પરેશાન થઈ રહ્યા છે. જે સ્ટ્રીટ લાઇટો ચાલુ છે તેમાં પણ પૂરતો પ્રકાશ ન આવવાથી અંધારા જેવી સ્થિતિ સર્જાય છે.

સ્ટ્રીટ લાઇટો બંધ હોવાની ફરિયાદોનું પ્રમાણ પણ ખૂબ ઊંચું છે. શહેરમાં સરેરાશ રોજની 350 થી 400 ફરિયાદો સ્ટ્રીટ લાઇટ બંધ હોવા અંગે નોંધાઈ રહી છે. આ લાઇટો જલ્દી રિપેર ન થતી હોવાની નાગરિકોની ઢગલાબંધ ફરિયાદો રોજ મળી રહી છે, જેના કારણે શહેરીજનોમાં ભારે રોષ જોવા મળી રહ્યો છે.

આ ગંભીર સમસ્યા અંગે ગઈકાલે ગુરુવારે યોજાયેલી સ્ટેન્ડિંગ કમિટીની બેઠકમાં પણ ચર્ચા કરવામાં આવી હતી. જોકે, આ ચર્ચાના પરિણામે નાગરિકોને ક્યારે રાહત મળશે તે જોવું રહ્યું.