સાપુતારામાં નાયબ મુખ્યમંત્રીના હસ્તે 'મોન્સૂન ફેસ્ટિવલ-2026'નો શુભારંભ, 13 રાજ્યોના કલાકારોએ જમાવ્યો રંગ

નાયબ મુખ્યમંત્રી શ્રી હર્ષભાઈ સંઘવીના હસ્તે સાપુતારા ખાતે પ્રકૃતિ અને સંસ્કૃતિના સંગમ સમાન ‘સાપુતારા મોન્સૂન ફેસ્ટિવલ-2026’નો ભવ્ય પ્રારંભ કરવામાં આવ્યો છે. આ ઉત્સવ આગામી તા. 29 ઓગસ્ટ સુધી ગુજરાતના એકમાત્ર હિલ સ્ટેશન સાપુતારાને પ્રકૃતિ, સંસ્કૃતિ, સાહસિક પ્રવૃત્તિઓ અને લોકકલાના રંગોથી મહેકાવશે.

ઉદ્ઘાટન સમારોહ બાદ એક ભવ્ય સાંસ્કૃતિક કાર્યક્રમનું આયોજન કરવામાં આવ્યું હતું. જેમાં 13 રાજ્યોના 110 કલાકારો દ્વારા નેશનલ એવોર્ડી કોરિયોગ્રાફી આધારિત નૃત્ય રજૂ કરવામાં આવ્યું હતું. આ ઉપરાંત, સ્થાનિક કલાકારોએ પરંપરાગત ડાંગી નૃત્યની મનમોહક રજૂઆત કરીને ઉપસ્થિત સૌને મંત્રમુગ્ધ કર્યા હતા.

નાયબ મુખ્યમંત્રીશ્રીએ જણાવ્યું હતું કે, સાપુતારા માત્ર એક હિલ સ્ટેશન નથી, પરંતુ તે ડાંગની સમૃદ્ધ સંસ્કૃતિ અને જીવંત પ્રકૃતિની ઓળખ છે. આ ફેસ્ટિવલ દ્વારા પ્રવાસીઓને ગુજરાતની વિવિધતાનો અનુભવ કરવાની તક મળશે.