આમોદમાં નગરપાલિકા કચેરીથી 200 મીટર દૂર ગાયના ગળામાં સાયકલ અને કેરેટ ફસાઈ, વીડિયો વાયરલ

આમોદ શહેરમાં રખડતાં પશુઓની સમસ્યા ફરી એકવાર પ્રકાશમાં આવી છે. નગરપાલિકાની કચેરીથી માત્ર 200 મીટરના અંતરે એક રખડતી ગાયના ગળામાં સાયકલ અને શાકભાજી-ફ્રૂટ વેચવાની કેરેટ ફસાઈ ગઈ હોવાની ઘટના સામે આવી છે. આ અજાયબીની ઘટનાનો વીડિયો સોશિયલ મીડિયા પર ઝડપથી વાયરલ થઈ રહ્યો છે.

આ વીડિયો વાયરલ થતાં જ નગરપાલિકાની કામગીરી સામે ગંભીર સવાલો ઊભા થયા છે. નગરપાલિકા કચેરીની નજીક જ રખડતાં પશુઓ હોવા છતાં સત્તાવારોએ કોઈ પગલાં ભર્યા ન હોવાનો આરોપ લગાવવામાં આવી રહ્યો છે. શહેરીજનોમાં નગરપાલિકાના અમલદારોની ઉદાસીનતા અંગે નારાજગી ફેલાઈ છે.

નોંધપાત્ર છે કે, નગરપાલિકા દ્વારા દરરોજ એક દિવસમાં 5 રખડતાં પશુઓ પકડવાની કામગીરી કરવામાં આવતી હોવાનું જણાવાય છે. છતાં શહેરમાં રખડતાં પશુઓની સમસ્યા યથાવત્ રહેલી છે. આમોદ શહેરમાં રખડતાં પશુઓને કારણે લોકોને અનેક સમસ્યાઓનો સામનો કરવો પડે છે.