અકોટામાંથી ડિગ્રી વગર 15 વર્ષથી પ્રેક્ટિસ કરતો બોગસ ડોક્ટર ઝડપાયો

વડોદરાના અકોટા વિસ્તારમાંથી એક બોગસ ડોક્ટરને પોલીસે ઝડપી પાડ્યો છે. આરોપીની ઓળખ બિસ્વજિત હાલદાર તરીકે થઈ છે, જે અકોટા ગાર્ડન પાસે 'પ્રોમિલા ક્લિનિક' ચલાવતો હતો. પોલીસ તપાસમાં જાણવા મળ્યું છે કે, આ શખ્સ છેલ્લા 15 વર્ષથી કોઈપણ મેડિકલ ડિગ્રી વગર પ્રેક્ટિસ કરી રહ્યો હતો.

એલસીબી ઝોન-2ની ટીમે બાતમીના આધારે આ કાર્યવાહી કરી હતી. પોલીસે જ્યારે ક્લિનિક પર દરોડો પાડ્યો ત્યારે ત્યાંથી એલોપેથી દવાઓ, ઇન્જેક્શનો, કફ સિરપ અને અન્ય મેડિકલ સાધનોનો મોટો જથ્થો મળી આવ્યો હતો, જે પોલીસે કબજે લીધો છે.

આ બોગસ ડોક્ટર સામે કાયદેસરની કાર્યવાહી હાથ ધરવામાં આવી છે. તેની મેડિકલ પ્રેક્ટિસ પાછળનો હેતુ અને તેણે કેટલા દર્દીઓની સારવાર કરી છે તે અંગે પોલીસ વધુ તપાસ કરી રહી છે.