ઉધના રેલવે સ્ટેશન પર દિવાળી-છઠ પૂજા માટે 13 હજાર ચોરસ મીટરનો પેસેન્જર હોલ્ડિંગ એરિયા તૈયાર

દિવાળી અને છઠ પૂજાના તહેવારો દરમિયાન ઘરે જતાં મુસાફરોની વધતી જતી ભીડને પહોંચી વળવા માટે ઉધના રેલવે સ્ટેશન પર એક મોટી વ્યવસ્થા ગોઠવવામાં આવી રહી છે. આ માટે લગભગ 13 હજાર ચોરસ મીટર વિસ્તારમાં એક વિશાળ પેસેન્જર હોલ્ડિંગ એરિયાનું નિર્માણ કાર્ય ચાલી રહ્યું છે.

રેલ લેન્ડ ડેવલપમેન્ટ ઓથોરિટી (આરએલડીએ) દ્વારા વિકસાવવામાં આવી રહેલું આ કેન્દ્ર મુસાફરોને પ્લેટફોર્મ પર મોકલતાં પહેલાં એક નિયંત્રિત જગ્યામાં રોકવાની સુવિધા આપશે. આનાથી સ્ટેશનના મુખ્ય પ્રવેશદ્વાર, પ્લેટફોર્મ અને બહારના સર્ક્યુલેટિંગ એરિયામાં થતી ભીડનું દબાણ ઘટાડવામાં નોંધપાત્ર મદદ મળશે.

આ હોલ્ડિંગ એરિયા ઓક્ટોબરના અંત સુધીમાં મુસાફરો માટે ખુલ્લો મૂકવામાં આવે તેવી યોજના છે. રેલવેનો ઉદ્દેશ્ય એ છે કે મુસાફરો સીધા પ્લેટફોર્મ પર ન જાય, પરંતુ પહેલા નિર્ધારિત હોલ્ડિંગ એરિયામાં રાહ જુએ. આ વ્યવસ્થા તહેવારો દરમિયાન મુસાફરોની અવરજવરને સુવ્યવસ્થિત કરવામાં અને અણધાર્યા સંજોગો કે નાસભાગ જેવી સ્થિતિની શક્યતાઓને ઘટાડવામાં મદદરૂપ થશે.

પશ્ચિમ રેલવેના મુખ્ય જનસંપર્ક અધિકારી વિનિત અભિષેકે જણાવ્યું કે પ્રોજેક્ટનું બાંધકામ ઝડપથી આગળ વધી રહ્યું છે. ઇમારતનું મુખ્ય માળખું અને છતનું કામ પૂર્ણ થઈ ગયું છે. હાલમાં ફ્લોર પર ટાઇલ્સ લગાવવા, જીઆરસી જાળી અને પોલીકાર્બોનેટ ફસાડ લગાવવાનું કામ અંતિમ તબક્કામાં છે.