સુરતમાં 13 વર્ષના સગીર પર દુષ્કર્મ: સુપરવાઇઝર ક્રિષ્નાનંદ મિશ્રાની ધરપકડ

સુરતના ઈચ્છાપોર વિસ્તારમાં એક અત્યંત શરમજનક અને અરેરાટીજનક ગુનાહિત કૃત્ય સામે આવ્યું છે. હજીરાની એક મોટી કંપનીમાં સુપરવાઇઝર તરીકે ફરજ બજાવતા અને ઈચ્છાપોર બસ સ્ટેન્ડ નંબર 3 નજીક આવેલી રેસિડેન્સીમાં રહેતા 45 વર્ષીય ક્રિષ્નાનંદ ઠાકોરજી મિશ્રા નામના આધેડે હેવાનિયતની તમામ હદો વટાવી દીધી છે.

સમાજમાં જવાબદાર હોદ્દો ધરાવતા આ આરોપીએ પુત્રની વયના માત્ર 13 વર્ષના દીકરાને શિકાર બનાવી સૃષ્ટિ વિરુદ્ધનું કૃત્ય આચર્યું હોવાનો આરોપ છે. આ ઘટનાની જાણ થતાં સ્થાનિક લોકોમાં ભારે રોષ જોવા મળ્યો હતો.

આ ગંભીર અપરાધ મામલે ઈચ્છાપોર પોલીસે આરોપી ક્રિષ્નાનંદ મિશ્રાની ધરપકડ કરી લીધી છે અને તેની સામે કાયદેસરની કાર્યવાહી હાથ ધરી છે. પોલીસ વધુ તપાસ કરી રહી છે.