પાવાગઢમાં નવરાત્રીના પ્રથમ નોરતે ભક્તોનો મહેરામણ, 1.25 લાખથી વધુ લોકોએ કર્યા દર્શન

શારદીય નવરાત્રીના પ્રથમ નોરતે પાવાગઢ ખાતે આવેલા ચાંપાનેર-પાવાગઢ શક્તિપીઠમાં મા મહાકાળીના દર્શન માટે ભક્તોનો મહેરામણ ઉમટી પડ્યો હતો. રવિવાર અને નવરાત્રીના પ્રથમ દિવસના શુભ સંયોગને કારણે ગુજરાત સહિત આસપાસના રાજ્યોમાંથી મોટી સંખ્યામાં શ્રદ્ધાળુઓ દર્શન માટે પહોંચ્યા હતા.

મળતી માહિતી અનુસાર, વહેલી સવારથી અત્યાર સુધીમાં અંદાજે 1.25 લાખથી વધુ ભક્તોએ મા મહાકાળીના દર્શનનો લાભ લીધો છે. હજુ પણ દર્શન માટે લાંબી કતારો જોવા મળી રહી છે, જે ભક્તોની આસ્થા દર્શાવે છે.

ભક્તોને દર્શન દરમિયાન કોઈ અગવડ ન પડે તે સુનિશ્ચિત કરવા માટે પોલીસ, વહીવટી તંત્ર અને મંદિર પ્રશાસન દ્વારા પૂરતી વ્યવસ્થાઓ ગોઠવવામાં આવી હતી. સુરક્ષા અને સુવિધા માટે ખાસ ધ્યાન રાખવામાં આવ્યું હતું.