ગાંધીધામ: એટલાસ કેબલ્સમાંથી રૂ. 10.47 લાખના કેબલ ચોરીના ગુનાનો ભેદ ઉકેલાયો, ત્રણ આરોપી ઝડપાયા

પૂર્વ કચ્છ પોલીસ દ્વારા મિલકત સંબંધી વણઉકેલાયેલા ગુનાઓ શોધી કાઢવા માટે હાથ ધરવામાં આવેલી સઘન કામગીરી દરમિયાન આ સફળતા મળી છે. પોલીસે સીસીટીવી ફૂટેજ અને હ્યુમન સોર્સની મદદથી તપાસ હાથ ધરી હતી. આ તપાસ દરમિયાન ચોરીમાં વપરાયેલા બોલેરો પીકઅપ વાહન અંગે મળેલી ચોક્કસ બાતમીના આધારે પોલીસે ત્રણ આરોપીઓને ઝડપી પાડ્યા હતા.

પોલીસે ઝડપેલા આરોપીઓમાં આસિફ ઈશાક સઠીયા (રહે. માધાપર), ઈમરાન આદમ કુંભાર અને રિઝવાન અબુબકર મજોઠી (બંને રહે. ભુજ)નો સમાવેશ થાય છે. પોલીસ તપાસ મુજબ, ઝડપાયેલા આરોપીઓ પૈકી એક આરોપી વાહનનો માલિક છે, એક આરોપી ચોરીનો વાયર ખરીદનાર છે અને અન્ય એક આરોપીએ ચોરીમાં મદદગારી કરી હોવાનું સામે આવ્યું છે.

પોલીસે આ ગુનાના સંબંધમાં અંદાજે રૂ. 3 લાખની કિંમતનું બોલેરો પીકઅપ વાહન પણ કબજે કર્યું છે. આ સમગ્ર કાર્યવાહી પોલીસ મહાનિરીક્ષક ચિરાગ કોરડિયા, પૂર્વ કચ્છ પોલીસ અધિક્ષક સાગર બાગમાર અને નાયબ પોલીસ અધિક્ષક મુકેશ ચૌધરીના માર્ગદર્શન હેઠળ ગાંધીધામ બી ડિવિઝન પોલીસ ઇન્સ્પેક્ટર એસ.વી. ગોજિયા સહિતની ટીમે પાર પાડી હતી.

પોલીસે ગુનામાં સંડોવાયેલા અન્ય આરોપીઓને ઝડપી પાડવા માટે વધુ તપાસ હાથ ધરી છે અને ચોરી થયેલા મુદ્દામાલને પણ કબજે કરવાની કવાયત હાથ ધરી છે.