ભરૂચમાં ફૂડ એન્ડ ડ્રગ વિભાગની કાર્યવાહી: બાયપાસ વિસ્તારની 10થી વધુ હોટલોમાં ચેકિંગ, એક હોટલ સીલ

ભરૂચ ફૂડ એન્ડ ડ્રગ વિભાગ દ્વારા શહેરના બાયપાસ વિસ્તારમાં આવેલી 10થી વધુ હોટલોમાં આકસ્મિક ચેકિંગ હાથ ધરવામાં આવ્યું હતું. આ કાર્યવાહીમાં ફૂડ વિભાગની ટીમની સાથે નગરપાલિકાની ટીમ, ફાયર ઇન્સ્પેક્ટર અને ડેપ્યુટી એસપી પણ જોડાયા હતા.

તપાસ દરમિયાન બાયપાસ ચોકડી પાસે આવેલી 'એસ.એન. તવા ફ્રાય' (S N TAWA FRY) નામની હોટલના રસોડામાં ભારે ગંદકી જોવા મળી હતી. સ્વચ્છતાના અભાવે તંત્ર દ્વારા આ હોટલને તાત્કાલિક અસરથી સીલ કરી દેવામાં આવી છે.

અધિકારીઓના જણાવ્યા અનુસાર, આ પ્રકારના સરપ્રાઈઝ ચેકિંગથી હોટલ અને લારી-ગલ્લાના સંચાલકોમાં ફફડાટ વ્યાપી ગયો છે. નિયમિતપણે કરવામાં આવતી આવી કાર્યવાહીથી વેપારીઓ સ્વચ્છતા જાળવવા પ્રેરાશે અને ગ્રાહકોને તાજું તેમજ શુદ્ધ ખાવાનું મળી રહેશે તેવી અપેક્ષા રાખવામાં આવી રહી છે.