અમદાવાદ: બેફામ કાર ચાલકે મોપેડને 1 કિલોમીટર સુધી ઘસડ્યું, ચાલકનો ચમત્કારિક બચાવ

અમદાવાદ શહેરમાં મોડી રાત્રે ડ્રાઈવ ઈન રોડ પર હિમાલયા મોલ પાસે અકસ્માતની એક ચોંકાવનારી ઘટના બની હતી. એક કાર ચાલકે બેફામ ગતિએ આવી રહેલી પોતાની કારથી એક મોપેડને જોરદાર ટક્કર મારી હતી.

આ ટક્કર એટલી ભયાનક હતી કે કાર ચાલકે મોપેડને અંદાજે 1 કિલોમીટર સુધી રસ્તા પર ઘસડી ગયો હતો. આ દરમિયાન, રસ્તા પર ઘર્ષણને કારણે તણખા ઊડતા જોવા મળ્યા હતા, જે ઘટનાની ગંભીરતા દર્શાવે છે.

સદનસીબે, આ અકસ્માતમાં મોપેડ ચાલકનો ચમત્કારિક રીતે બચાવ થયો હતો. જોકે, ટક્કર અને ઘસડવાને કારણે મોપેડનો સંપૂર્ણપણે કચ્ચરઘાણ નીકળી ગયો હતો. ઘટનાસ્થળે હાજર સ્થાનિક લોકોએ કાર ચાલક નશાની હાલતમાં હોવાનો આરોપ લગાવ્યો છે.