🔥 TRENDING Security Forces Uncover Maoist Arms Ca... Chhattisgarh Declared Naxal-Free, Open... Chhattisgarh Admin Promotes Senior IAS... SGPC President Election: Sukhbir Badal... BJP's Yatra Strategy Faces Scrutiny Ov... Bridge Collapses in Punjab Two Years A...
20 Nov 2026•
ગુજરાતી मराठी ਪੰਜਾਬੀ বাংলা
Local

କେନ୍ଦ୍ରାପଡ଼ାର ଲକ୍ଷ୍ମୀପୂଜାକୁ ପୂରିଲା ୧୦୦: ସୁରକ୍ଷା ବ୍ୟବସ୍ଥା ତଦାରଖ କଲେ କେନ୍ଦ୍ରାଞ୍ଚଳ ଆଇଜି

✍️ Reporter: Deepak Mahapatra 🗓 27 Oct 2026, 01:12 PM 👁 82
Share: 💬 WhatsApp 📘 Facebook 𝕏 Post
କେନ୍ଦ୍ରାପଡ଼ା: କେନ୍ଦ୍ରାପଡ଼ାର ପ୍ରସିଦ୍ଧ ଲକ୍ଷ୍ମୀପୂଜା ଚଳିତ ବର୍ଷ ଶତବାର୍ଷିକୀ ପାଳନ କରୁଛି । ଏହାକୁ ଶାନ୍ତିପୂର୍ଣ୍ଣ, ସୁରକ୍ଷିତ ଓ ଶୃଙ୍ଖଳିତ ଭାବେ ସମ୍ପନ୍ନ କରିବା ପାଇଁ ଜିଲ୍ଲା ପୋଲିସ ପ୍ରଶାସନ ପକ୍ଷରୁ ବ୍ୟାପକ ଓ ବହୁସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। କେନ୍ଦ୍ରୀୟ ରେଞ୍ଜ, କଟକର ଆଇଜିପି ଡକ୍ଟର ସତ୍ୟଜିତ ନାୟକ ନିଜେ ସୁରକ୍ଷା ବ୍ୟବସ୍ଥାର ସମୀକ୍ଷା କରିବା ସହ ସମ୍ପୃକ୍ତ ଅଧିକାରୀମାନଙ୍କୁ ଆବଶ୍ୟକୀୟ ନିର୍ଦ୍ଦେଶ ଦେଇଛନ୍ତି।
ଉତ୍ସବ ଅବସରରେ ସମଗ୍ର ସହରରେ ବ୍ୟାପକ ପୋଲିସ ମୁତୟନ କରାଯାଇଛି। ଏଥିରେ ୨୨ ପ୍ଲାଟୁନ୍ ପୋଲିସ ଫୋର୍ସ, ୨ ଜଣ ଅତିରିକ୍ତ ଏସ୍‌ପି, ୧୦ ଜଣ ଡିଏସ୍‌ପି ଓ ୨୦ ଜଣ ଥାନାଧିକାରୀଙ୍କ ସମେତ ୧୫୦ ଜଣ ଏସ୍‌ଆଇ ଓ ଏଏସ୍‌ଆଇ, ୨୫୦ ଜଣ କନଷ୍ଟେବଳ ଏବଂ ୩୦୦ ଜଣ ହୋମ୍‌ଗାର୍ଡ ନିୟୋଜିତ ହୋଇଛନ୍ତି। ଭିଡ଼ ନିୟନ୍ତ୍ରଣ ଓ ଜରୁରୀ ପରିସ୍ଥିତିର ମୁକାବିଲା ପାଇଁ ଜଣେ ଇନ୍ସପେକ୍ଟର ଓ ଗୋଟିଏ ପ୍ଲାଟୁନ୍ ଫୋର୍ସଙ୍କ ନେତୃତ୍ୱରେ ୮ଟି ଡ୍ରାଗିଂ ଟିମ୍ ଗଠନ କରାଯାଇଛି। ସହରର ପ୍ରମୁଖ ସ୍ଥାନଗୁଡ଼ିକରେ ୬ଟି ଅସ୍ଥାୟୀ ପୋଲିସ ଆଉଟ୍‌ପୋଷ୍ଟ ସ୍ଥାପନ କରାଯାଇଥିବା ବେଳେ ଷ୍ଟ୍ରାଇକିଂ ଫୋର୍ସ ଓ ବାଇକ୍ ପାଟ୍ରୋଲିଂ ଟିମ୍ ନିରନ୍ତର ନଜର ରଖିବେ।
ସୁରକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ କରିବା ପାଇଁ ଆଧୁନିକ ପ୍ରଯୁକ୍ତିବିଦ୍ୟାର ଉପଯୋଗ କରାଯାଇଛି। ଏଥିପାଇଁ ୨୪ ଘଣ୍ଟିଆ ପୋଲିସ କଣ୍ଟ୍ରୋଲ୍ ରୁମ୍ କାର୍ଯ୍ୟକ୍ଷମ ରହିଛି ଏବଂ ଜନଗହଳିପୂର୍ଣ୍ଣ ସ୍ଥାନଗୁଡ଼ିକ ଉପରେ ନଜର ରଖିବାକୁ ସହରର ବିଭିନ୍ନ ସ୍ଥାନରେ ୩୨ଟି ସିସିଟିଭି କ୍ୟାମେରା ଲଗାଯାଇଛି। ସ୍ୱଚ୍ଛତା ଓ ଉତ୍ତରଦାୟିତ୍ୱ ସୁନିଶ୍ଚିତ କରିବା ପାଇଁ ଏସ୍‌ଆଇ ଓ ଥାନାଧିକାରୀମାନଙ୍କୁ ବଡି-ୱର୍ଣ୍ଣ କ୍ୟାମେରା ଯୋଗାଇ ଦିଆଯାଇଛି। ଏଥିସହ ବଡ଼ ଜନସମାଗମ ଉପରେ ନଜର ରଖିବାକୁ ଡ୍ରୋନ୍ ମାଧ୍ୟମରେ ନିରୀକ୍ଷଣ କରାଯାଉଛି। ଶ୍ରଦ୍ଧାଳୁ ଓ ଦର୍ଶନାର୍ଥୀଙ୍କ ଯାତାୟାତ ସୁଗମ କରିବା ପାଇଁ ସ୍ୱତନ୍ତ୍ର ପାର୍କିଂ ଓ ଟ୍ରାଫିକ୍ ବ୍ୟବସ୍ଥା କରାଯାଇଛି। ମହିଳାଙ୍କ ସୁରକ୍ଷା ଏବଂ ଛିନ୍‌ତାଇ ଓ ଅସଦାଚରଣ ଭଳି ଅପରାଧ ରୋକିବା ପାଇଁ ସାଧା ପୋଷାକରେ ଆଣ୍ଟି-ସ୍ନାଚିଂ ଟିମ୍ ଓ ଆଣ୍ଟି-ଇଭ୍‌ଟିଜିଂ ଟିମ୍ ନିୟୋଜିତ ହୋଇଛନ୍ତି।
ସୁରକ୍ଷା ବ୍ୟବସ୍ଥାର ସମୀକ୍ଷା ପରେ କେନ୍ଦ୍ରୀୟ ରେଞ୍ଜର ଆଇଜିପି ଡକ୍ଟର ସତ୍ୟଜିତ ନାୟକ ଏବଂ କେନ୍ଦ୍ରାପଡ଼ା ଏସ୍‌ପି ସିଦ୍ଧାର୍ଥ କାଟେରିଆ, ଆଇପିଏସ୍‌ଙ୍କ ନେତୃତ୍ୱରେ ଏକ ଫ୍ଲାଗ୍ ମାର୍ଚ୍ଚ ଅନୁଷ୍ଠିତ ହୋଇଥିଲା। ଏହା ଜନସାଧାରଣଙ୍କ ମଧ୍ୟରେ ସୁରକ୍ଷା ଓ ଆତ୍ମବିଶ୍ୱାସର ଭାବନା ସୃଷ୍ଟି କରିବା ସହ ଅସାମାଜିକ ତତ୍ତ୍ୱମାନଙ୍କୁ ଦୃଢ଼ ବାର୍ତ୍ତା ଦେବା ଉଦ୍ଦେଶ୍ୟରେ କରାଯାଇଥିଲା। ମୂର୍ତ୍ତି ବିସର୍ଜନ ଶୋଭାଯାତ୍ରା ସମୟରେ ଆଇନଶୃଙ୍ଖଳା ରକ୍ଷା ଓ ଉତ୍ସବର ସୁରୁଖୁରୁରେ ସମାପନ ପାଇଁ ୩୫ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯିବ।
ପୋଲିସ ପ୍ରଶାସନ ପକ୍ଷରୁ ଜନସାଧାରଣଙ୍କୁ ପୋଲିସ ସହ ସହଯୋଗ କରିବା, ଟ୍ରାଫିକ୍ ଓ ପାର୍କିଂ ନିୟମ ପାଳନ କରିବା, ଗୁଜବ ପ୍ରଚାର ନକରିବା ଏବଂ ଗୁଜବରେ ବିଶ୍ୱାସ ନକରିବାକୁ ଅନୁରୋଧ କରାଯାଇଛି। ଏଥିସହ କୌଣସି ସନ୍ଦେହଜନକ ବ୍ୟକ୍ତି କିମ୍ବା କାର୍ଯ୍ୟକଳାପ ଦୃଷ୍ଟିକୁ ଆସିଲେ ତୁରନ୍ତ ପୋଲିସ କଣ୍ଟ୍ରୋଲ୍ ରୁମ୍ କିମ୍ବା ନିକଟସ୍ଥ ପୋଲିସ ଅଧିକାରୀଙ୍କୁ ସୂଚନା ଦେବାକୁ ନିବେଦନ କରାଯାଇଛି।
📲Get App