🔥 TRENDING Security Forces Uncover Maoist Arms Ca... Chhattisgarh Declared Naxal-Free, Open... Chhattisgarh Admin Promotes Senior IAS... SGPC President Election: Sukhbir Badal... BJP's Yatra Strategy Faces Scrutiny Ov... Bridge Collapses in Punjab Two Years A...
20 Nov 2026•
ગુજરાતી मराठी ਪੰਜਾਬੀ বাংলা
Politics

ଆର୍ଥିକ ମହାଶକ୍ତି ଆଡ଼କୁ ଆଉ ଏକ ପଦକ୍ଷେପ: ଭୁବନେଶ୍ୱରରେ ଆରବିଆଇର ୧୬୯ କୋଟିର ଡାଟା ସେଣ୍ଟର ଉଦ୍‌ଘାଟନ କଲେ ପ୍ରଧାନମନ୍ତ୍ରୀ

✍️ Reporter: Deepak Mahapatra 🗓 26 Oct 2026, 01:14 PM 👁 83
Share: 💬 WhatsApp 📘 Facebook 𝕏 Post
ଭୁବନେଶ୍ୱର: ଦେଶର ଡିଜିଟାଲ୍ ଆର୍ଥିକ କାରବାରକୁ ଆହୁରି ସୁରକ୍ଷିତ, ଦକ୍ଷ ଏବଂ ମଜବୁତ୍ କରିବା ପାଇଁ ଓଡ଼ିଶା ମାଟିରୁ ଆରମ୍ଭ ହୋଇଛି ଏକ ବଡ଼ ଅଭିଯାନ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଭୁବନେଶ୍ୱରସ୍ଥିତ ଜଟଣୀ ଇନ୍‌ଫୋଭ୍ୟାଲି-୨ଠାରେ ଭାରତୀୟ ରିଜର୍ଭ ବ୍ୟାଙ୍କ (RBI)ର ୧୬୯ କୋଟି ଟଙ୍କା ବ୍ୟୟରେ ନିର୍ମିତ ଅତ୍ୟାଧୁନିକ ଗ୍ରୀନ୍‌ଫିଲ୍ଡ ଡାଟା ସେଣ୍ଟର ଏବଂ ସାଇବର ସୁରକ୍ଷା ତାଲିମ ପ୍ରତିଷ୍ଠାନର ବିଧିବଦ୍ଧ ଉଦ୍‌ଘାଟନ କରିଛନ୍ତି। ପ୍ରାୟ ୧୮.୫୫ ଏକର ଜମିରେ ପରିବ୍ୟାପ୍ତ ଏହି ସଂସ୍ଥାର ସୁରକ୍ଷା ଓ ଭିତ୍ତିପ୍ରସ୍ତର ସ୍ଥାପନ ୨୦୨୩ ମାର୍ଚ୍ଚ ୨୨ରେ ତତ୍କାଳୀନ ଆରବିଆଇ ଗଭର୍ଣ୍ଣର ଶକ୍ତିକାନ୍ତ ଦାସଙ୍କ ଦ୍ୱାରା ହୋଇଥିଲା।
ଡିଜିଟାଲ୍ ବ୍ୟାଙ୍କିଂ ଓ ପେମେଣ୍ଟ ପ୍ରଣାଳୀ ହେବ ଆହୁରି ସୁରକ୍ଷିତ
ଏହି ନୂତନ ଡାଟା ସେଣ୍ଟର ଭାରତର କ୍ରିଟିକାଲ୍ ପେମେଣ୍ଟ ସିଷ୍ଟମ୍ ଏବଂ ଡିଜିଟାଲ୍ ଆର୍ଥିକ ଲେଣଦେଣ ଗୁଡ଼ିକୁ ସୁରକ୍ଷିତ ରଖିବାରେ ମୁଖ୍ୟ ଭୂମିକା ଗ୍ରହଣ କରିବ। ଦେଶରେ ଦ୍ରୁତ ଗତିରେ ବୃଦ୍ଧି ପାଉଥିବା ପ୍ରଯୁକ୍ତିବିଦ୍ୟା-ଚାଳିତ ଅର୍ଥନୀତି ପାଇଁ ଏହା ଏକ ବିଶ୍ୱସନୀୟ ଡିଜିଟାଲ୍ ଭିତ୍ତିଭୂମି ଯୋଗାଇଦେବ।
ଅନ୍ୟପଟେ, ସାଇବର ସୁରକ୍ଷା ତାଲିମ ପ୍ରତିଷ୍ଠାନ ମାଧ୍ୟମରେ ଆର୍ଥିକ କ୍ଷେତ୍ରରେ ସାଇବର ଆକ୍ରମଣର ମୁକାବିଲା କରିବା ପାଇଁ ବିଶେଷଜ୍ଞ ତିଆରି କରାଯିବ। ଏହା ସାଇବର ସିକ୍ୟୁରିଟି, କୃତ୍ରିମ ବୁଦ୍ଧିମତ୍ତା (AI), କ୍ୱାଣ୍ଟମ୍ କମ୍ପ୍ୟୁଟିଂ ଏବଂ ଏଣ୍ଟରପ୍ରାଇଜ୍ ଟେକ୍ନୋଲୋଜି କ୍ଷେତ୍ରରେ ଗବେଷଣା ଓ ତାଲିମ ପ୍ରଦାନ କରିବ।
କାହିଁକି ବଛାଗଲା ଭୁବନେଶ୍ୱରର ଜଟଣୀ ?
ସରକାରୀ ଅଧିକାରୀଙ୍କ ଅନୁଯାୟୀ, ଭୌଗୋଳିକ ଦୃଷ୍ଟିକୋଣରୁ ଏହି ସ୍ଥାନଟି ସମ୍ପୂର୍ଣ୍ଣ ସୁରକ୍ଷିତ। ଏହି ଅଞ୍ଚଳ ଭୂକମ୍ପ ପ୍ରବଣ ମଣ୍ଡଳ (Seismic Zone)ରୁ ବାହାରେ ରହିବା ସହ ଉଚ୍ଚ ବିପଦପୂର୍ଣ୍ଣ ଆନ୍ତର୍ଜାତୀୟ ସୀମାରୁ ଯଥେଷ୍ଟ ଦୂରରେ ଅବସ୍ଥିତ। ଏହି କାରଣରୁ ପ୍ରାକୃତିକ ବିପର୍ଯ୍ୟୟ କିମ୍ବା ଜାତୀୟ ନିରାପତ୍ତା ଦୃଷ୍ଟିରୁ ଏହା ଡାଟା ସୁରକ୍ଷା ପାଇଁ ସବୁଠାରୁ ଉପଯୁକ୍ତ ବୋଲି ବିଚାର କରାଯାଇଛି।
ଏହି ଭବ୍ୟ ଉଦ୍‌ଘାଟନୀ ସମାରୋହରେ ଓଡ଼ିଶା ରାଜ୍ୟପାଳ ବ୍ରଜମୋହନ ରାମ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ, ଆଦିବାସୀ ବ୍ୟାପାର ମନ୍ତ୍ରୀ ଜୁଆଲ ଓରାମ, ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରା, ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହ ଦେଓ, ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା, ସାଂସଦ ଅପରାଜିତା ଷଡ଼ଙ୍ଗୀ ଏବଂ ମନମୋହନ ସାମଲଙ୍କ ସମେତ ଅନେକ ବରିଷ୍ଠ ନେତା ଓ ପ୍ରଶାସନିକ ଅଧିକାରୀ ଉପସ୍ଥିତ ଥିଲେ।
📲Get App