🔥 TRENDING Indian Weddings Return in Grand Style... Sai Pallavi's OM Event Performance Spa... Actress Keerthy Suresh Clarifies Comme... Prashanth Neel‑presented film ‘418’ pr... AAP to Launch 2027 Punjab Election Cam... Punjab BJP Welcomes Former AAP, SAD an...
20 Nov 2026•
ગુજરાતી मराठी ਪੰਜਾਬੀ বাংলা
Local

గుండాల మండల కేంద్రంలో ఘనంగా సద్దుల బతుకమ్మ వేడుకలు: ఏడో రోజే ప్రత్యేక ఆచారం

✍️ Reporter: Sudagani Harikrishna 🗓 16 Oct 2026, 07:13 PM 👁 138
Share: 💬 WhatsApp 📘 Facebook 𝕏 Post

తెలంగాణ సంస్కృతిలో భాగమైన బతుకమ్మ పండుగను గుండాల మండల కేంద్రంలో ప్రత్యేక సంప్రదాయంతో ఘనంగా నిర్వహించారు. తొమ్మిదో రోజు కాకుండా ఏడో రోజే సద్దుల బతుకమ్మ జరుపుకోవడం ఇక్కడి ప్రత్యేకత.

తెలంగాణ సంస్కృతి సంప్రదాయాలకు ప్రతీకగా నిలిచే బతుకమ్మ పండుగ, గుండాల మండల కేంద్రంలో ప్రత్యేక సంప్రదాయంతో అంగరంగ వైభవంగా జరిగింది. సాధారణంగా తొమ్మిదో రోజు సద్దుల బతుకమ్మ నిర్వహించడం ఆనవాయితీ కాగా, గుండాలలో మాత్రం ఏడో రోజే సద్దుల బతుకమ్మను జరుపుకోవడం తరతరాలుగా కొనసాగుతున్న ప్రత్యేక ఆచారం. ఈ సంప్రదాయానికి అనుగుణంగా శుక్రవారం మండల కేంద్రంలో సద్దుల బతుకమ్మ ఉత్సవాలు ఘనంగా నిర్వహించారు.

గ్రామ సమీపంలోని బతుకమ్మ బండపై ఉత్సవాల కోసం ప్రత్యేక ఏర్పాట్లు చేశారు. విద్యుత్ దీపాల వెలుగుల్లో అలంకరించిన బతుకమ్మ బండ వద్ద, రంగురంగుల పూలతో అందంగా పేర్చిన బతుకమ్మలతో ఆడపడుచులు చేరుకుని సందడి చేశారు. వేద పండితులు శ్రీనివాస్ శర్మ గౌరమ్మ పూజ నిర్వహించి ఉత్సవాలను ప్రారంభించారు. అనంతరం మహిళలు భక్తిశ్రద్ధలతో బతుకమ్మల చుట్టూ తిరుగుతూ సంప్రదాయ పాటలు పాడుతూ ఆటపాటలతో అలరించారు.

సంప్రదాయబద్ధంగా బతుకమ్మ ఆటలు ముగిసిన అనంతరం మహిళలు గ్రామ సమీపంలోని రామసముద్రం చెరువుకు చేరుకున్నారు. అక్కడ గంగమ్మ ఒడిలో బతుకమ్మలను నిమజ్జనం చేసి గౌరమ్మకు భక్తిపూర్వకంగా వీడ్కోలు పలికారు. ఏడో రోజే సద్దుల బతుకమ్మ నిర్వహించుకోవడం గుండాల ప్రత్యేకతగా నిలవగా, ఈ ఆచారం స్థానిక మహిళల్లో విశేషమైన అనుబంధాన్ని చాటిచెప్పింది.

బతుకమ్మ ఉత్సవాల సందర్భంగా జిల్లా, మండల స్థాయి నాయకులు మహిళలకు పండుగ శుభాకాంక్షలు తెలిపారు. వివిధ కుల సంఘాలు, రాజకీయ పార్టీల నాయకులు ఏర్పాటు చేసిన ఫ్లెక్సీలు, డీజే సౌండ్‌తో ఉత్సవ ప్రాంగణం సందడిగా మారింది. తెలంగాణ ఆడపడుచుల ఆత్మగౌరవానికి, పూల పండుగ వైభవానికి ప్రతీకగా నిలిచిన సద్దుల బతుకమ్మ వేడుకలు గుండాల మండల కేంద్రంలో పండుగ వాతావరణాన్ని నింపాయి.
📲Get App