🔥 TRENDING Nitesh Tiwari's 'Ramayana' Hits ₹650 c... Haryana postpones final SIR roll to De... Haryana Athlete Who Ran From SAI Locat... CBI Nabs Haryana GST Officer for Rs 10... Pro Hockey League 2026 kicks off today... Punjab National Bank Shares Reach Fres...
20 Nov 2026•
ગુજરાતી मराठी ਪੰਜਾਬੀ বাংলা
વિરપુર બસ સ્ટેન્ડમાં શૌચાલય ત્રણ દિવસથી બંધ, મુસાફરો ખુલ્લામાં શૌચક્રિયા કરવા મજબૂર
Local

વિરપુર બસ સ્ટેન્ડમાં શૌચાલય ત્રણ દિવસથી બંધ, મુસાફરો ખુલ્લામાં શૌચક્રિયા કરવા મજબૂર

✍️ Reporter: AKASH JOSHI 🗓 06 Oct 2026, 02:12 PM 👁 83
Watch on: ▶️ YouTube
Share: 💬 WhatsApp 📘 Facebook 𝕏 Post

મહિસાગર જિલ્લાના વિરપુરમાં કરોડો રૂપિયાના ખર્ચે બનેલા નવા બસ સ્ટેન્ડનું શૌચાલય ત્રણ દિવસથી બંધ છે, જેના કારણે મુસાફરો ખુલ્લામાં શૌચક્રિયા કરવા મજબૂર બન્યા છે અને તંત્રની જાળવણી સામે સવાલો ઉભા થયા છે.

મહિસાગર જિલ્લાના વિરપુર પંથકમાં કરોડો રૂપિયાના ખર્ચે અત્યાધુનિક સુવિધાઓ સાથે તૈયાર કરવામાં આવેલા વિરપુરના નવા બસ સ્ટેન્ડને હજુ એક વર્ષ પણ પૂર્ણ થયું નથી, ત્યાં જ તેની સુવિધાઓની જાળવણી સામે ગંભીર સવાલો ઉભા થયા છે. બસ સ્ટેન્ડનું શૌચાલય છેલ્લા ત્રણ દિવસથી બંધ છે અને તેના પર ખંભાતી તાળા મારી દેવામાં આવ્યા છે. એટલું જ નહીં, મુસાફરોને શૌચાલયનો ઉપયોગ ન કરવા અંગેના બોર્ડ પણ લગાવી દેવામાં આવ્યા છે. શૌચાલયની ગટર કે ટાંકી ડટ ભરાઈ જતાં તેને બંધ કરવાની નોબત આવી હોવાનું સામે આવ્યું છે.

નવીન બસ સ્ટેન્ડમાં એક વર્ષમાં જ શૌચાલય જેવી પાયાની સુવિધા ખોરવાઈ જતાં તંત્રની કામગીરી અને જાળવણી વ્યવસ્થા સામે તર્કવિતર્ક શરૂ થયા છે. શૌચાલય બંધ હોવાના કારણે બહારગામથી આવતા મુસાફરો ભારે હાલાકી ભોગવી રહ્યા છે. મહિલાઓ, બાળકો અને વૃદ્ધો માટે સ્થિતિ વધુ મુશ્કેલ બની છે. શૌચાલયની સુવિધા ઉપલબ્ધ ન હોવાથી કેટલાક મુસાફરો તો બસ સ્ટેન્ડની આસપાસ ખુલ્લામાં શૌચક્રિયા કરવા મજબૂર બની રહ્યા છે. પરિણામે બસ સ્ટેન્ડની આસપાસ ગંદકીના દ્રશ્યો જોવા મળી રહ્યા છે.

એક તરફ ‘સ્વચ્છ ગુજરાત’ના નારા લગાવવામાં આવે છે, તો બીજી તરફ જાહેર સ્થળે મૂળભૂત શૌચાલય સુવિધા પણ ત્રણ દિવસથી બંધ રહેતાં ગંભીર પ્રશ્નો ઉભા થયા છે. કરોડો રૂપિયાના ખર્ચે બનેલા બસ સ્ટેન્ડમાં જો એક વર્ષમાં જ આવી સમસ્યા સર્જાય તો તેની ગુણવત્તા અને આયોજન અંગે પણ સવાલો ઉઠી રહ્યા છે. મુસાફરોની મુશ્કેલીનો તાત્કાલિક અંત આવે અને શૌચાલયની સુવિધા તુરંત કાર્યરત કરવામાં આવે તેવી માંગ ઉઠી છે.
📲Get App